الحقيقة الساخرة

عايزين نعمل بكرة عزومة 
وتفرد وشك . بلاش الزلومة
العيلة هتكون ملمومة
والسفرة عايزاها ذواتي

الدش البايظ صلحته؟
الاكل العادم ملحته؟
الواد الفاشل فلحته؟
طاب اخويا للبيت روحته؟
ماترد عليا سايبني بهاتي
…
أنا ماسحة
إياك تدخل بالجزمة
وبلاش تعمل
من كلمتي أزمة
مش طايقة أنا كلمة.
مالهاش لازمة
هنقطك أنا أهوه بسكاتي
…
في ربط القمطة
تأخد أوسكار
البوسه هتبقي..
كأنها منكر
والطلبات بتزييييد
وبتكتر
والحب
بيلَطَّم فيه الموج العاتي
…..
تزعل أوي لو بصيت بره
طب بصي لنفسك لو مرة
وأعملي زي الست الشاطرة
علشان مايكونشي…
بصباص وفلاتي..
…
الناس عمرها.. ماهتديكم
عيشوا حياتكم علي أديكم
الخير يكتر أوي ف إيديكم
وهيبقي كتير أوي بزيادة
….
م الحب أبنوا ليكم سور
جوه الضلمة هيكون نور
ومهما يلف العمر. يدور
الحب الصادق. بيدي سعادة
…..
#كلمات_ناجح_ثروت