إياكم والشركات الوسيطة فى مجال الأنترنت
المقال هيكون بالعامية المصرية زي ماحصل بالظبط
إياكم والشركات الوسيطة فى مجال الأنترنت
…….
خلي بالك كويس
سبق وإشتركت من فترة مع شركة متخصصة فى الشغل على الانترنت والأعمال الفنية الدجيتال
مثل
( الكول تون – وقنوات اليوتيووب – والمواقع وخلافه )
…
فى البداية
هما طلبوا منى الاشتراك وقعدت معاهم وأتفقنا وكتبنا عقد
وبصراحة كانوا قمة فى الذوق والإحترام فى البداية
وبعدين المفروض العقد كان بينص على أنه التقارير تجيني كل 3 شهور بحد أقصي وده ماحصلشي نهائيا وكمان كل اللي عملوه أنهم بس كانوا بيأخدوا أرباح قناتى على اليوتيوب مهما كانت ضعيفة يعني أصلا مش هتجيب 10 دولار فى الشهر
بعد فترة 6 شهور
وبعدها بسنة طلبت التقارير مافيش أى تقارير جاتني وطلبت بفسخ العقد
مشاكل فسخ العقد
وعلشان أفسخ العقد فضلت 6 شهور أروح وأجي وأتصل ورسايل وشات ولا حياة لمن تنادي يعني أتفسخ العقد بعد سنة ونص ولكن بدون أى فايدة وطلعت أنا الخسران .
الأستاذة المسئولة لما قولتلها أنه مافيش مصداقية
وفيه تهرب من المسئولية وغيره
قالتلى أصلا المحتوي بتاعك مابيجبشي فلوس قولتلها المفروض فى العقد
مكتوب إنكم هتعملوا دعاية علشان توصلوا الأعمال لناس أكبر
ثم إنكم أنتوا اللي طلبتوا أتعاقد معاكم مش أنا
ولو عارفين المحتوي بتاعي فاشل ماكنتوش طلبتوا منى نتعاقد معاكم
الأسوء من كدة للأسف إنه أغلب الشركات دي بتشتغل مع شركات تانية وسيطة وعند كتابة العقد أنت بتديهم حق إدارة المحتوى وإنهم هيكون هما الوحيدين اللى ينفع يحققوا أرباح من خلاله علشان فى النهاية كله يصب فى مصلحتهم وبعدين يدوك جزء من الأرباح – فكانت المشكلة الأكبر إنه أعمالى الكاملة من إنتاجي وأنا صاحب الحق الأول وأنا المؤلف للكلمات بتاعت الأغاني والترانيم
بقيت تحت رحمتهم هما وتحت رحمة الشركات اللى هما متعاقدين معاها فبعد فسخ العقد فوجئت إنى كل الفيديوهات اللى كانت عندي على القناة اللى هى مثلا أغاني وترانيم جاي عليها مخالفة حقوق طبع ونشر ومطالبات
تواصلت معاهم تاني قالولى إحنا فيه شركة وسيطة معانا هى اللى رافعه الشغل ده على الانرتنت وعاملة contant id
والشركة دي هما فسخوا معاها العقد وللأسف إحنا اللى بنروح فى الرجلين
وبعد عناء وشكاوى ليوتيوب وتقدم مايثبت أحقيتي فى المحتوى وتقديم فسخ العقد
تم عودة الأعمال بعد ما إستمر الموضوع ده مش أقل من سنة تانية يعني سنتين ونص وأنا فى المعاناة دي
نصائح بعد تجربة
- بلاش الإشتراك فى شركات وسيطة على الإنترنت
- إشتغل بنفسك وطور من محتواك سواء قناة يوتيوب أو موقع إلكتروني أو أى منصة بتقدم عليها المحتوي
- كل هم الشركات الوسيطة هى الأرباح مهما كانت هتأخدها منك وهيضيع تعبك لأنهم فى الغالب علشان يديروا المحتوى بتاعك هيأخدوا منك نسبة كبيرة جدا هتوصل ل 50% من الأرباح
- علشان تطور من محتواك الموضوع حاليا بقى أسهل بكتير وموجود كورسات وشروحات كتير جدا على يوتيوب لشرح كل شيء الوقت اللى هتضيعه فى متابعة شغلك مع الشركات الوسيطة أعمله أنت وأستفيد بيه
- الفلوس اللى هتضيعها معاهم فى إنهم بيأخدوا جزء كبير من أرباحك طور بيه محتواك
- هات كاميرا جديدة أو مايك جديد طور من جهاز الكمبيوتر بتاعك والبرامج المستخدمة
- الشغل على الانترنت كويس ومربح ولكن عايز جد واجتهاد وعمل بصورة مستمرة
وبعدها بسنة طلبت التقارير مافيش أى تقارير جاتني وطلبت بفسخ العقد