سجال إرتجالي رومانسي “شعر عامية”

اترك تعليقاً / أشعار بالعامية, أشعار عامية



Nageh Sarwet
تعالى نرسم الأيام
نلونها بلون تاني
نخطي خطوة لقدام
ونرسم بالحروف معاني
………….
Badrya Mahmoud
مساء الخير ع الحلوين
وقلبى ليكو مستنى
مساء الخير ياحور العين
وبيكو قلبى تاه منى
…………
Nageh Sarwet
مساء الفل والطيبة
على كل القلوب تماً
والمحبة مش غريبة
لا بكيفاً ولا بكماً
…….
Badrya Mahmoud
لما الحب يدق لبابك
خبي واوعي تقول لاصحابك
داري الحب ف قلبك واقفل
احسن تلقي السهم دا صابك
……….
Nageh Sarwet …..
حتى الحب بطبعه غريب
بيوصلنا لحالة عجيبة
بينور ف القلب لهيب
بيرجعنا بعد الغيبة
………..
Badrya_Mahmoud#
ورغم البعد والمسافات
بنتلاقى خطاوينا
بتسبقنا وتتشاقى
ونتواعد ونتباعد
ورغم قسوه ف الايام
هشوفك تانى ف الاحلام
ولسه قلوبنا مشتاقه
………..
Nageh Sarwet
الحب ….
بيسكّن فـ قلوبنا آهات
بيرجعنا لعصر حنون
بيصّحي فـ القلب سكات
كان من مدة فيه مدفون
…………
Badrya_Mahmoud#
وبحن لايامنا ساعات
ولا يفرق كان بينا سكات
مالى حياتنا بهمس حنون
ولا فيه بينا حدود مسافات
……..
Nageh Sarwet
….
بيعيشنا ف زمن الماضي
ويسافر بينا على بكرة
بس اللي قلبه كان فاضي
بالنسباله الحب دا ذكرى
………
.Badrya Mahmoud
ذكرى تخلى القلب يطير
اويسافر ويا العصافير
بس بحن لايام عدت
عقلى عجز عن التفكير
…………
Nageh Sarwet
……..
أنا قلبي متدارى ف روحي
بتبططب روحي عليه
ولما تزيد جوايا جروحى
روحي تقدر تداويه
…………..
Badrya Mahmoud
وانا روحى كانت وياك
احلى عيون وبقلب ملاك
بس حنين جارف خلانى
اابعد عن فلبى واهواك
……………………………..
Nageh Sarwet
…..
مسكونة روحي بحبيبى
مرسومة هي ف تفاصيله
بشتاقله يطفي لهيبي
بكتب شعري وبغنيله
…..
Badrya Mahmoud
لو ع الغنا راح اغنى كتير
قلب حبيبى جناح الطير
اجرى اتخبى جواه واهرب
من اى كلام ولا تفكير
………..
Nageh Sarwet
……
أنا قلبي مطمن بيه
بيفرح قلبي بضحكاته
قلبي دايما مشتاق ليه
عاشق كل كلامه وسكاته
………
Badrya Mahmoud
كان السكات بينا كلام
وكان لقانا احلى غرام
ولمسه من عنيا ليه
حضنت لقانا بالسلام
Nageh Sarwet
…….
كل المشاعر منه وليه
حتى الحياه منه بأخدها
وشوقى اللي جوه عينيه
وروحي اللي معاه واخدها
……………………….
Badrya Mahmoud
جوا الروح عاشقه حروفك
وابعد من جواك خوفك
اصل انا عشقه الحنين
لحظه ماقلبى يشوفك
………………………………………
Nageh Sarwet
……
الشعر في وصفه قليل
والحياة من غيره ماتسويش
من شفايفه بيسري نيل
ولا العيون لأ ماتقوليش ؟!
Badrya Mahmoud
حبنى من جوا قلبك
اوعى تقولى متقدريش
لو هوايا يسرى جمبك
راح تقولى فيكى اعيش
Nageh Sarwet
………..
حبيبتى يعني الصوت الدافى
يعني كل كلام الحب
حبيبتى هى الوش الصافى
لما بشوفها عمري مابتعب
………………….
Badrya Mahmoud
جوا حضن الليل حبيبى
هيسافر جوا عيونى
ولو على الاشواق خلينى
اخبيك جوا جفونى
……………………
Nageh Sarwet
………..
حبيبتى عيون متدارية ف عيني
بتيجي معاها نسايم الفل
ولما بقعد ياما معاها
لا بيزهق قلبي ولا يمل
…………………………
Badrya Mahmoud
نسمايه من هواك عدت عليا
نستنى من تانى ال بيجرا ليا
من الهوى ووحنينه اللى
وهبتله قلبى وعنيا
……………………………….
Nageh Sarwet
………..
كل مشاعر الحب معاها
بطعم جديد
واليوم اللى شايفها فيه
بحسه يوم عيد
……………..
Badrya Mahmoud
لما حبيبى بيبعد مره
بنسى انه ف يوم هيعود
لما داق الغيره المره
قالى انى قدره و مكتوب
………………..
Nageh Sarwet
….
بلاقي صوتها بيغير
كل ملامح ليلي ويومي
بحس بانى طفل صغير
لمابتحضن قلبي ف نومي
…………………….
Badrya Mahmoud
ياللى ساكنى وبيحلالى
احضن شوقك وبيهنالى
اتنفس احلامك والقى
قلبى يجرى ليك يالغالى
………………………..
Nageh Sarwet
….
شوق الليل مخلوط بآهات
وسكونه بيصحي سكوني
قلبي عاشقكك ياست البنات
منين ياحبيبتى ماتكوني
………………
Badrya Mahmoud
حبيبى ف بالى وتملى
ماانا عاشقه تفاصيلك
وحتى عذابى يهنالى
ومش هحكى ولا اشكيلك
……………
Nageh Sarwet
…….
حتى القلب الساكن قلبي
عايش بيها
حتى النبض الساري ف نبضي
بينادي عليها
…………………………………..
Badrya Mahmoud
انا راح اكون جوا قلبك
ولا ابعد ياحبيبى ف يوم
حافظ دايما ع عهدك
وافرشلك ف سمايا نجوم
………….
Nageh Sarwet ..
بيقولها الشوق مش ناسي
تفاصيلك أنتى وملامحك
أوعى تخلى قلبك قاسي
وأن بعدتي واللهي ماهيسامحك
……………………………………..
Haidy Gogo
بشتاقلك حتى ف وجودك
شوق حضنى اتمناك
تملى كل فراغى حدودك
ف القلب شيﻻك
………………….
Badrya Mahmoud
وجوايا حنين جارف
للحظه عشق كت بينا
ولو احلامى هتسافر
لقلبك وانسى حاسدينا
………………..
Nageh Sarwet ………
انا قلبي موزون بميزانها
والشوق فارد جناحاته
لو هفضل اعدد فى ميزاتها
لا الشعر يكفى ولا كلماته
………………………
Badrya Mahmoud
فوق الوجود بيكون وجودك
وحدودى هى حيطان قلبك
ولو هوايا لك امتلاك
ما انا كلى حبيبى ملكك
……………………….
Nageh Sarwet
….
فى وسط التوهة بلقاكي
لقلبي دليل
مايقدرشي قلبي ينساكي
ياغني المواويل
……………….
Badrya Mahmoud
وبارسم ع السما صورتك
وبانده ليه ع اسمك
ولو حتى عيونه بعدو
بشوف بقلبى ضحكاتك
…………………………
Nageh Sarwet
…….
برسم صورتها العاشقة
على حدودى
فتيجي وبحنان راشقة
بوسة على خدودى
……………………………..
Badrya Mahmoud
ياحضن دفيان بالمحبه
ياقلب حب ولا استخبى
ياعاشق ف الهوا قصه
انا حبيت وقلبى له لبى
…………………..
Haidy Gogo
بحروفى وشوقها بكتبلك
بوصفلك ف الحب عذاب
شوف قلبى ف دقه يشبهلك
والباقى ياروحى اغراب
…………….
Nageh Sarwet
……..
انا قلبي كما النايات
بيعزف بس على قلبك
ولو قلبي فى قلبك مات
اخر كلماته بحبك
……………….
Badrya Mahmoud
وبعشق فيك سكون قلبى
وبكتب بيك ف احساسى
ماانا قلبى وبيك مسكون
وقلبك هو حراسى
……………..
Nageh Sarwet
………
تعالى نقسم الهوا بينا
ونسمع للعاشقين صوتنا
وقلوبنا ببعض تتغنى
ونكمل مع بعض سكتنا
………………….
Badrya Mahmoud
سكتنا مفروشه بشوقنا
والعشاق تعزف خطاوينا
لازم حبى نقتل خوفنا
ونلون فرحتنا ف عينا
……………………….
Haidy Gogo
بدمعه عينى هحكيلك
ياقلب اتربى فيه نبضى
ف عينى وقلبى راح اشيلك
وتحضن بالحنين قلبى
………………..
Nageh Sarwet
………..
تعالى نحلي أفراحنا
بصوت الشوق وآهاته
يكون الكون دا مطرحنا
بصوته وسكونه وسكاته
………………
Badrya Mahmoud
جوا سكون الليل بعزفلك
ع قلبى واسمع دقاته
راح ياحبيبى اكيد يوصفلك
وهترجملك كل لغاته
…………………………..
Nageh Sarwet
…………..
جوه ليالي العشق هقول
كل كلام الحب بصوتى
وحبيبتى بس اللي تنول
كل أشعارى وسكوتى
…………….
Badrya Mahmoud
انسى بيا حبيبى الكون
بدل بيا كل حياتك
حس بقلب ياقلبى حنون
راح تنسى ويايا سكاتك
……………………..
Nageh Sarwet
….
حتى الكون بيضيق وياكي
وبسأله ياكون متكتف ليه
بيقولى بيبلم وهو شايفنى وياكى
من عيون حبيبك أرحمنى يابيه
……………………..
Haidy Gogo
تعالى نحكى للعشاق
عن حب يشبه الجنه
وقلبين بينهم الاشواق
وفرحه عمر تستنى
………………
Badrya Mahmoud
جوا القلب النار مخفيه
جوا الروح الروح مضويه
لكن عاشقه احساس انك
ساكن قلبى وهو شويه
…………………
Nageh Sarwet
…………
تعالى نداوي أيامنا
بشوق الروح
ونخلي كل كلامنا
يفي جروح
يانبض متخبي جوايا
يا أصل البوح
………..
Badrya Mahmoud
عمرى ماابوح انا مره بحبه
اصل القلب اهو داب من قربه
بس حنينى والاشواق
خلتنى كده هايمه ف حبه
…………………
Nageh Sarwet
…………..
أنا عاشق تفاصيل التوهة
لما بتوه جوه عنيها
ولما بحس أنها خايفة
جوه عنيا بسرعه بخبيها
………………..
Badrya Mahmoud
انا هتخبى جوا ف قلبه
ماانا عاشقه تفاصيله
ولوع القرب انا دايما جنبه
وتملى حبيبى بحكيله
……………
Nageh Sarwet
….
صوتها دافي وكله حنان
ولا شيء بيقدر يكتفه
تقولشي أيه منبع حنان
(مليون كمنجة بيعزفوا)
……………………….
Badrya Mahmoud
لما بيعزف الكمان
بلقى شوقى ياخدنى ليه
واغرق وحدى ف الغرام
جوا جنه بحورها عنيه
………….
Nageh Sarwet
…..
هى ليا كل حياتي
بتغير تفاصيل الكون
بتبدل دايما سكاتى
لشوق مخلوط بجنون
…………..
Badrya Mahmoud
ماهو حقيقى الحب جنون
وقلبى ليه بهواه مسكون
راح افك طلاسمه وحروفه
واهرب منه فين مايكون
…………………
Nageh Sarwet
…….
الدنيا بتفاصيلها جميلة
جوه عنيها
والفرحة مجموعه الليلة
بلمس ايديها
………………………
Badrya Mahmoud
وف النهايه اصله حبيبى وبعشفه
وجوا روحى مصدقاه
ولو هيبعد عن هوايا ف يوم اناهلحقه
ولا اسلم امرى لسواه
……..
Nageh Sarwet
………..
يخلص كلام الشعر
ولا يخلص حبي ليها
أنا بانيلىها ف قلبي قصر
تسكن فيه معاليها
………………………………
Badrya Mahmoud
وف الاحلام قصور ياما
لكن قصرك ف قلبى متاح
وع العشاق لا ملامه
وبيك بملا الحياه وافراح
………………………………
Nageh_Sarwet#
وانا فى امور الملكات سلطان
والجواري ماتعنيني ولا تعنيها
ولو يقف عند حبيبتي الزمان
على كل عروش الكون أعليها
……………….
Badrya Mahmoud
حبيبى ملك عرش قلبى
وهو فى هوايا سلطان
ولما وهبت اليه حبى
وهواه الروح طول الزمان
………………
Nageh_Sarwet
وف ختام كل الكلام
الحياة من غيره مالهاش لزوم
الحب يعني سلام
يعني روح على مر الزمن بتدوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *